تخاريف ليلية

كان نفسي ماتقروش كلامي

كان نفسي كلامي يبقى له معني عندكم لو حصل وقريتوه

في رواية أخرى, كان نفسي أبقى خفية

أبقى خفيفة وحقيقية

.

كان نفسي اللي بيأخد باله من الناس حواليه, يعرف ياخد باله من نفسه

وكان نفسي اللي بيحل مشاكل الناس كلها, يحل مشاكله الاول

.

كان نفسي تبقى الدنيا أوضح من كده

وكان نفسي أبقى دايما عارفة ومتأكدة أنا بأعمل إيه

.

كان نفسي اللي ببيطمن الناس دايما, يبقاله حد مصدر أمان دائم

كان نفسي اللي بيمشي يحضن الناس, يلاقي الأمان في حضن حد

كان نفسي اللي بيفسر كل حاجة للناس بسهولة, يعرف يفهم افكاره بـسلاسة

كان نفسي الناس تعرف تعيش الحياة اللي هي تختارها, مش اللي اتفرضت

.

كان نفسي يبقى الهدوء الداخلي ده حاجة واضحة ولو الواحد مشي على مسار معين, يوصله

كان نفسي دماغي تبقى اروق من كده, هي مكنتش كده زمان

عشان أنا مكنتش كده زمان

كان نفسي أفهم اللي بقوله لنفسي بليل قبل منام

وكان نفسي أفهم اللي باكتبه كل يوم وانا زهقانة

ونفسي الناس تبطل تسألني ليه على كل حاجة

ونفسي, حقيقي نفسي, أعيش في غير مكان

أبدأ من الصفر واختار حاجات كتير اتفرضت عليا

حتى لو رجعت بالزمان واخترتها تاني برضه, عالاقل هابقى المرة دي واعية أكتر

.

أقول لكم, أنا أصلا منفسيش في حاجة

أو يمكن بأقول كده عشان عارفة إني مش هاعرف أوصل لحاجة منهم

فـأحسن ماعوزش أي حاجة

كل الكلام ده هيفرق في إيه

عارفين؟ أصلا كل اللخبطة اللي مكتوبة فوق دي بينالكم إنها بتعكس كركبة في دماغي

و مش هأقول إنه ده غلط, بس مش بتوصلكم الهدوء اللي بيبقى في دماغي لما باكتب

لما باكتب ومحدش حواليا, لما باكتب اللي أنا عيزاه- أول مانجح إني أشيل من دماغي فكرة إن في حد هيعرفني هيقرا ده

آه, نفسي كل اللي يعرفوني يبطلوا يقروا, لأني عارفة إن محدش فيهم فاهم

بس يعني في الآخر, هو مين فاهم نفسه عشان يفهم غيره أصلا

وبعدين لو فهمت نفسي, هقعد أعمل إيه بقيت الوقت

.أنا شخصيا مقتنعة إن الجري ورا الذات ده, هو اللي على مدار سنين حياتنا, بيفهمنا احنا مين

بس ساعات بتعب مني, زي دلوقتي كده

ومش عايزة أطلع اقرا فوق عشان لو عملت كده, هامسحه

صدقوني احتمال كبير تكون اللي بتكتب الحاجات دي, والشخصية اللي بتقابلوها, اتنين مختلفين, في جسم واحد

بس الحاجة الوحيدة اللي هما متفقين عليها, هي الكتابة

ده الشيء الثابت من ساعة ماهما الإتنين اتقسموا وسمحتلهم أنا يعيشوا مع بعض ومع الناس

.

.

أتمنى من قلبي تكونوا مش فاهمين حاجة, عشان عارفة أني لما اتوهكوا هتبطلوا تسألوا وتنسوا الموضوع, وتخليكوا فريش

تصبحوا على خير

(:

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: